CIDETEC Surface Engineering intsektuen aurkako estaldura omnifobikoak ikertzen ari da hegazkinetarako
STELLAR proiektua buru-belarri ari da soluzio berriak garatzen, aireontzietako erresistentzia eta erregai-kontsumoa murrizteko
Hegazkinak ez dira zerua zeharkatzen bakarrak, eta, goi horietako elkarbizitzan, naturaren oztopoei aurre egin behar izaten diete. Aireontziek lor ditzaketen garapenak ugaritu eta abiadura handitu ahala, beste arazo bat sortzen zaio industria aeronautikoari, zeinak erresistentzia-koefizientea areagotzen baitu: intsektuak, hain zuzen. Pilatu egiten dira aireontzien hegaletan, eta horrek eragin negatiboa du airearen banaketan: fluxu laminarra aldatzen du eta, ondorioz, eragin zuzena du erregai-kontsumoan.
STELLAR proiektuak hilabeteak daramatza lanean, garbiketa-soluzioak ez ezik, kutsaduraren aurkako estaldura eraginkor eta iraunkor berriak ere garatzen. Eginkizun horretan, intsektu-hondakinen propietateei eta horiek gainazalarekin duten interakzioari buruzko jakintza sakona dituzte oinarri.
CIDETEC Surface Engineering Belgikako Materia Nova zentroak koordinatutako proiektuko bazkidea da, eta itsaspen txikiko soluzioak garatzen ari da, intsektuek aireontziaren fuselajean eragindako kutsadura arintzeko. Intsektuen hemolinfarekin dago lotuta intsektu-hondarrak hegalen eraso-ertzeko gainazalean pilatzea, eta, beraz, CIDETEC kutsaduraren aurkako estalduretan ari da lanean, fluido hori aldaratzeko propietate handiak dituzten soluzio omnifobikoetan oinarrituta.
Proiektua lortzeko aurreikusitako hiru urteko aldiaren erdia gainditu ostean, CIDETEC Surface Engineeringek hainbat estrategia ditu irekita: ainguraketa polimeriko bidezko gainazal-aldaketa, matrize polimeriko batean funtzionalizatutako nanopartikulak eta ionogel-teknologia. Estaldura omnifobiko horiek, gainazaleko energia libre txikiari eta propietate irristakor bikainei esker, itsaspen-maila apaleko gainazaletara bideratzen dute, zeinak erresistenteak baitira intsektuen hemolinfagak eragindako kutsadurarekiko.
Proiektua CleanSky 2 programaren barruan gauzatua da, eta haren helburua da hegazkinek sorturiko CO2 isurpenak eta zarata-mailak murriztea. Ia bi milioi euroko aurrekontua du, eta, aurreikuspenen arabera, 2023ko urrian amaituko da.
