Surfaces-Engineering

Lantegia martxoaren 24an eta 25ean egin zen, Boecillo-ko Teknologia Parkean, Valladoliden (Espainia). Jorge Rodriguez doktoreak, ECOLAND proiektuaren koordinatzaileak (Aerospaziorako Negozio Garapenaren Burua, CIDETEC) eta Raul de Sajak, ECOLAND proiektuko parte hartzaileak (CTMEko Teknologiaren Transferentziarako Bulegoaren Zuzendariak) aurkeztu zituzten proiektuaren ideia nagusiak.

Rodriguez doktoreak aeroespazioan gainazalaren tratamenduan —substantzia eta prestakin kimikoen erregistroa, ebaluazioa, baimen-ematea eta mugatzea egiteari buruzko Europako (EE) 1907/2006 Erregelamendua (REACH) betetze aldera— gaur egun jarraitzen diren joerei buruz hitz egin zuen. Gaur egun aeroespazioan gainazalen tratamendurako erabiltzen diren aluminioaren eta altzairuaren aukera nagusiak aurkeztu zituen. Gaur egun aluminiozko pieza aeronautiko batzuk babesteko erabiltzen diren CAA (azido kromikoko anodizatua) eta seibalioko kromoa daukaten hasleetarako aukera bat garatzen ari da ECOLAND. Proiektuak lurreratze-trenetako aluminio-aleaziorako seibalioko kromorik gabeko elektroestaldura anaforetikoko prozesua balioztatzea du helburu.

Bestalde, De Saja jaunak aipatu zuen CTMEko Clean Sky proiektuaren parte dela ECOLAND. CTME da ECOLAND proiektuko LCA eta ekodiseinuarekin lotutako jardueren arduraduna, eta elektroestaldura anaforetikoak ingurumenean eragiten dituen hobekuntzak aztertuko ditu (energia-kontsumoaren murriztapena, kromorik gabeko prozesuak, konposatu organiko lurrunkorren igorpenen murriztapena, etab.)

ECO-PROTECT “Ingurumenerako jasangarri diren tratamenduen garapena aluminiozko piezak babesteko, industria aeroespazialean”  proiektuaren segimendua egiteko bilera RESCOLLen instalazioetan egin zen martxoaren 7an.

ECO-PROTECT proiektuak, Eurostars-2 deialdian onartutakoa baita, helburutzat du Cr(VI) gabeko tratamenduak garatu eta karakterizatzea, industria aeroespazialean erabilitako aluminio-aleazioak babesteko. Tratamendu alternatibo horiek barne dute aurretratamendua, zeina funtsezkoa den alternatiba horiek erabiltzeko.        

Geometria eta aplikazio desberdinak estaltzeko soluzio bakarra ez dagoenez gero, bi estaldura garatu eta balidatzea proposatzen da: Alde batetik lodiera txikiko estaldura organikoa, geometria konplexuak babesteko; eta beste alde batetik, inprimazio organiko bat, kromorik gabea, esprai bidez emana tamaina handiko piezak estaltzeko. Bi aukerek bete egin beharko dituzte eskakizun aeroespazialak, batez ere kanpoan erabiltzekoak badira.

Proiektua FINITEC ELECTRÓLISIS (Madril) enpresak gidatzen du eta enpresa hauen partaidetza du, CHEMPLATE MATERIALS (Bartzelona), RESCOLL (Frantzia) eta STILZ-CHIMIE (Frantzia), eta horrez gain, CTME (Miranda de Ebro) eta CIDETEC (Donostia) ditu azpikontratatuta. Proiektuak, CDTI-k Espainian (Interempresas Internacional deialdia) eta BPI-k Frantzian finantziatua baita, 1 506 880€-ko aurrekontua du eta 30 hilabete irauten du.

Informazio gehiago: https://www.eurostars-eureka.eu/project/id/11890

Mat4Rail proiektua Horizon 2020 programaren barruan dago, eta Shift2Rail Joint Undertaking ekimenaren esparruan finantzatu da; otsailean, estandarizatzeko gaietarako aholkularitza-kontseiluak lehenengo bilera egin zuen. Bilera Madrilen izan zen, Espainiako Trenen Fundazioaren instalazioetan, eta Talgo-k eta CIDETECek elkarrekin antolatu zuten. Batzordean parte hartu zuten, gainera, PIVOTeko zenbait kidek, S2R ekimenaren barruan ere, eta Normalizatzeko Europako Batzordearen (CEN) zenbait lantaldetako kanpo-aholkulariak.

Bi proiektuotan orain arte tren-sektorerako material eta lotura berrien eremuan zer emaitza lortu dituzten aurkezteko ez ezik, bi konpromiso garrantzitsu erdiesteko ere balio izan zuen ekitaldiak.

Batetik, CEN TC256 batzordearen barruan estandarizazio-talde berria osatzeko aktiboki parte hartzera konprometitu ziren Mat4Rail eta PIVOT, tren-sektorean material berriak ezarri eta onartzeko. Lantaldea otsailaren amaieran bildu zen lehenengoz, Bruselan, eta bi proiektuotako ordezkariek parte hartu zuten bileran.

Bestalde, CENeko ordezkariek konpromisoa hartu zuten tren-sektorerako lotura itsasgarriei buruzko 52 lantaldean (EN WI 000256799 “Adhesive bonding of rail vehicles and parts”) garatzen ari den estandar berria Mat4Rail-ekin eta PIVOTekin partekatzeko. 

Oro har egiaztatuta geratu da bileraren arrakasta; izan ere, lankidetza aktiboan aritu dira Shift2Rail ekimenaren barruko proiektu osagarriak, eta, horrez gain, Mat4Rail eta PIVOT proiektuetako kideek ahaleginak egin dituzte euren proiektuetan lortutako emaitzek estandar berriak sortzeko balio dezaten, trenetako kutxa-egituretan material berriak (zehazki, konposatuak) eta material desberdinen arteko lotura itsasgarriak erabiltzea barnean hartuta.

Otsailaren 20an eta 21ean Harvest proiektuko partzuergoak bilera egin zuen Università degli Studi di Padova unibertsitatean, proiektuaren garapenaren 6. hilabetea dela eta.

Europako Batzordeak finantzatzen du HARVEST proiektua, eta 4 milioi eurotik gorako aurrekontua du. Helburua sorkuntza termoelektriko bidez (TEG) erabil daitezkeen egiturazko eta erabilera anitzeko konposite-materialak garatzea da, etorkizunean sektore aeronautikoan aplikatu ahal izan daitezen.

Bileran, CIDETECen buruzagitzapean garatzen ari diren 1. eta 8. laneko paketeetan zer aurrerapen lortu diren azaldu zuen Virginie Boucher doktoreak. Bi jardunaldietan, laneko pakete guztietan egindako aurrerabidea berrikusi zuten bildutakoek, hurrengo hilabeteetarako laneko plangintzan aurrera egin zuten, eta proiektuarekin lotutako zenbait alderdi eztabaidatu zituzten.

Partzuergoa irailaren 5ean eta 6an bilduko da berriz, Atenasen, Hegazkintzako eta Espazioko Berrikuntzari buruzko Nazioarteko 9. Konferentziarekin (EASN) batera.

CIDETEC Surfafe Engineeringek duela gutxi COST Action e MINDSen workshoparen azken edizioan parte hartu du, zeinetan CIDETECek proiektuko lantalde bat zuzentzeaz gainera Espainiako ordezkarien artean parte hartu duen.

Milango Politeknikoko instalazioetan egin zen workshopa, otsailaren 13tik 15era bitartean.  Bertan, CIDETEC Surface Engineeringeko Asier Salicio ikertzaileak hitzaldi hau eman zuen: “Development and characterization of monolayered and multilayered electroless NiP coatings”.

Europako herrialde ezberdinetako ikertzaileak bildu ziren workshopera, eta hitzaldi-egitarau zabala eskaini zuen elektrokimikaren eremuko garapen berrien inguruan. Programa zientifikoaz gainera, CIDETEC Surface Engineeringek workshop honetara bertaratzearen bidez Europako beste ikerketa-agente askorekin dituen harremanak sendotzen jarraitu du.